الرئيسية
( الفانوس السحرى ) ( قصة قصيرة )
- يلا يا بابا .. ميعاد الحكايات .
- إنت مش بتشبع حكايات أبدا ؟
- وهى حكاياتك ينشبع منها يا بابا ؟ .. ما أنا قلت لك إن الحكايات عندى أجمل حاجة فى الدنيا .. بس بعدك طبعا .
- يا أونطجى يا نصاب .
- والله بجد يا بابا ، ما اقدرش أعيش من غيرك .
- طيب قول لى لما بابا يموت هاتعمل إيه ؟
- هاموّت نفسى .
- .................................
- إيه يا بابا سكت ليه ؟
- مش عارف أقول لك إيه .
- طيب يلا القصص أهى .. احكى بقى .. أنا عارف ليه يا ربنا ما خلقتنيش قصة ؟
- ..............................
- بس المشكلة يا بابا لو كان ربنا خلقنى قصة كان ممكن حد يقطعنى .. الحمد لله يا ربنا إنك ما خلقتنيش قصة ..يلا بقى .
- صلى على النبى ...............................................................................................
- الله حلوة قوى يا بابا .
- يلا يا جميل .. دورك بقى .
- بس أنا يا بابا ما بعرفش أقرا .
- عارف يا غلباوى .. ما انت كل يوم بتألف من دماغك .. يلا ..
- صلى على النبى .
- عليه الصلاة والسلام .
- كان فيه بابا .. كان جميل قوى وطيب خالص .. لما باعمل حاجة غلط وأجرى بسرعة عشان أقول له عليها ، بيدينى حتة علقة !! ..يقوم يبوسنى بوسة كبيرة ويقول لى ما تعملش كده تانى .. أنا الصراحة ساعات ما بكونش عملت حاجة أصلا وأروح أقول له كده عشان البوسة بس .. بعدين بابا ده عرف إنى بضحك عليه فقال لى كده إنت بتكدب .. قلت له ما انت عارف السبب إنى بحبك يا بابا .. عارف .. هتقول لى إنى لازم أحب ربنا والرسول أكتر وبعدين بابا .. المهم يا سيدى .. بابا الحلو ده سافر عشان يجيب فلوس وسابنى .. وأنا قعدت أعيط كتير .. كتير خالص ، وما سكتش إلا لما قال لى فى التليفون إنه كده هيزعل منى .. مش عارف والله يعنى هو مفيش فلوس كتير هنا ليه ؟.. فى الحضانة ولاد كتير باباهم بيجيبهم ويروحهم وأنا كأنى ما ليش بابا ... ماما بتذاكر لى ، بس مش شاطرة زى بابا وبتزعق لى كتير كمان ... السنة اللى فاتت يوم ما كان بابا مسافر كان بيصورنى بالكاميرا فى البيت ، حطنى وسط شنطة السفر الكبيرة وصورنى ... قلت والله يا بابا هاعملك مقلب وأستخبى جوة الشنطة وتفتحها تلاقينى هناك .. صحيت من النوم أدور على الشنطة ما لقيتهاش ومالقيتش بابا ... المرة دى والله ما هنام خالص .. ليه يا ربنا ما خلقتش فلوس كتير هنا ؟ .. هو إحنا عايزين فلوس ليه أصلا ؟ .. الست اللى بتنام فى الجنينة اللى جنبنا هى والنونو بتاعها ، بابا قال لى ما عندهمش بيت وكان بياخدنى كتير معاه بالليل نعطيها أكل .. طيب إحنا عندنا بيت .. بابا قال إنه بفلوس كتير فى الشهر .. طيب ما أنا بكرة هاشتغل وأجيب فلوس كتير قوى .. بابا الحلو ده سألنى مرة وهو خارج عاوز إيه يا حبيبى ؟ .. قلت له عاوز فانوس سحرى .. قال لى لسة بدرى على رمضان .. قلت له لأ مش عاوز فانوس رمضان .. أنا عاوز الفانوس السحرى اللى بيطلع منه العفريت .. بس يكون عفريت طيب زى ما كان فى فيلم امبارح .. بابا ضحك وقال لى هتطلب منه إيه ؟ .. قلت له طبعا فلوس كتير خالص عشان ما تسافرش .. والله يا ربنا لو خليتنى ألاقى الفانوس السحرى مش هاعمل حاجة غلط تانى .. طيب قول انت يا ربنا ممكن بابا ما يسافرش ازاى ؟ .. بابا .. بابا .. إنت بتعيط ولا إيه ؟! .
- تمت – إيهاب رضوان – 19/1/2008
- يلا يا بابا .. ميعاد الحكايات .
- إنت مش بتشبع حكايات أبدا ؟
- وهى حكاياتك ينشبع منها يا بابا ؟ .. ما أنا قلت لك إن الحكايات عندى أجمل حاجة فى الدنيا .. بس بعدك طبعا .
- يا أونطجى يا نصاب .
- والله بجد يا بابا ، ما اقدرش أعيش من غيرك .
- طيب قول لى لما بابا يموت هاتعمل إيه ؟
- هاموّت نفسى .
- .................................
- إيه يا بابا سكت ليه ؟
- مش عارف أقول لك إيه .
- طيب يلا القصص أهى .. احكى بقى .. أنا عارف ليه يا ربنا ما خلقتنيش قصة ؟
- ..............................
- بس المشكلة يا بابا لو كان ربنا خلقنى قصة كان ممكن حد يقطعنى .. الحمد لله يا ربنا إنك ما خلقتنيش قصة ..يلا بقى .
- صلى على النبى ...............................................................................................
- الله حلوة قوى يا بابا .
- يلا يا جميل .. دورك بقى .
- بس أنا يا بابا ما بعرفش أقرا .
- عارف يا غلباوى .. ما انت كل يوم بتألف من دماغك .. يلا ..
- صلى على النبى .
- عليه الصلاة والسلام .
- كان فيه بابا .. كان جميل قوى وطيب خالص .. لما باعمل حاجة غلط وأجرى بسرعة عشان أقول له عليها ، بيدينى حتة علقة !! ..يقوم يبوسنى بوسة كبيرة ويقول لى ما تعملش كده تانى .. أنا الصراحة ساعات ما بكونش عملت حاجة أصلا وأروح أقول له كده عشان البوسة بس .. بعدين بابا ده عرف إنى بضحك عليه فقال لى كده إنت بتكدب .. قلت له ما انت عارف السبب إنى بحبك يا بابا .. عارف .. هتقول لى إنى لازم أحب ربنا والرسول أكتر وبعدين بابا .. المهم يا سيدى .. بابا الحلو ده سافر عشان يجيب فلوس وسابنى .. وأنا قعدت أعيط كتير .. كتير خالص ، وما سكتش إلا لما قال لى فى التليفون إنه كده هيزعل منى .. مش عارف والله يعنى هو مفيش فلوس كتير هنا ليه ؟.. فى الحضانة ولاد كتير باباهم بيجيبهم ويروحهم وأنا كأنى ما ليش بابا ... ماما بتذاكر لى ، بس مش شاطرة زى بابا وبتزعق لى كتير كمان ... السنة اللى فاتت يوم ما كان بابا مسافر كان بيصورنى بالكاميرا فى البيت ، حطنى وسط شنطة السفر الكبيرة وصورنى ... قلت والله يا بابا هاعملك مقلب وأستخبى جوة الشنطة وتفتحها تلاقينى هناك .. صحيت من النوم أدور على الشنطة ما لقيتهاش ومالقيتش بابا ... المرة دى والله ما هنام خالص .. ليه يا ربنا ما خلقتش فلوس كتير هنا ؟ .. هو إحنا عايزين فلوس ليه أصلا ؟ .. الست اللى بتنام فى الجنينة اللى جنبنا هى والنونو بتاعها ، بابا قال لى ما عندهمش بيت وكان بياخدنى كتير معاه بالليل نعطيها أكل .. طيب إحنا عندنا بيت .. بابا قال إنه بفلوس كتير فى الشهر .. طيب ما أنا بكرة هاشتغل وأجيب فلوس كتير قوى .. بابا الحلو ده سألنى مرة وهو خارج عاوز إيه يا حبيبى ؟ .. قلت له عاوز فانوس سحرى .. قال لى لسة بدرى على رمضان .. قلت له لأ مش عاوز فانوس رمضان .. أنا عاوز الفانوس السحرى اللى بيطلع منه العفريت .. بس يكون عفريت طيب زى ما كان فى فيلم امبارح .. بابا ضحك وقال لى هتطلب منه إيه ؟ .. قلت له طبعا فلوس كتير خالص عشان ما تسافرش .. والله يا ربنا لو خليتنى ألاقى الفانوس السحرى مش هاعمل حاجة غلط تانى .. طيب قول انت يا ربنا ممكن بابا ما يسافرش ازاى ؟ .. بابا .. بابا .. إنت بتعيط ولا إيه ؟! .
- تمت – إيهاب رضوان – 19/1/2008
.
